Уругвай афсоналаридан бири, бир неча йиллар давомида ҳимояда ишончли ўйин кўрсатган футболчи Диего Роберто Годинни ҳаммамиз яхши таниймиз. У Мадриднинг «Атлетико» клуби ҳамда Уругвай термаси сафида ҳақиқий қўрғон бўлиб келган. Табиийки, унинг фикрлари кўпчилик учун қизиқдир. Бугун ишқибозлар орасида ким кучли: Месси ёки Роналду деган савол тинмай айланади. Ушбу саволга Годин ҳам жавоб берган. Албатта, унинг фикрларига кимдир қўшилади, кимдир эса йўқ. Эътиборингизга унинг таққосларини ҳавола этамиз.
Ким кучли: Месси ёки Роналду?
2010 йилдан 2019 йиллар давомида «Атлетико» Мадрид таркибида тўп сурган Годин икки афсона Лео ва Криштианулар ҳақида шундай деган:
«Мен «Атлетико»да ўйнаб юрган кезларимда икки буюк футболчига қарши ўйнашимга тўғри келган. Бири — «Барселона» юлдузи Лионель Месси бўлса, иккинчиси ўша пайтдаги «Реал» Мадрид юлдузу Криштиану Роналду эди. Уругвай сафида ҳам уларга қарши ўйнашга тўғри келган. Биласизми нима? Мен бу икки футболчига уларнинг энг чўққига чиққан даврларида рўбарў келганман. Месси барибир кучлироқ эди. Унга қарши ўйнаб бўлмасди. У шубҳасиз, футбол тарихидаги дунёнинг энг кучли футболчиси бўлиб қолаверади.
Кимгадир Марадона қирол бўлиши мумкин ёки Пеле. Аммо мен учун Лео энг кучлиси бўлган. Яна бир кўрсаткич: мен Мессига қарши энг кўп майдонга тушган жамиики футболчилар орасида иккинчи ўринда бўлганман», — дейди Диего.
Годин яна нималарни айтди?
«Атлетико» жамоаси собиқ сардорининг фикрларини давом эттирамиз.
«Биз 2014 йили «Атлетико» билан Испания чемпиони бўлганмиз. Мазкур ҳолат бошқа чемпионларникидан 10 баравар қадрлироқ бўлган. «Эл-классико» эгалари даврида улардан ўтиб, Ла Лига ғолиби бўлиш осон иш эмасди. Буни билган билади», — қўшимча қилди уругвайлик собиқ ҳимоячи.
Мана шунақа гаплар. Месси ёки Роналду қайси бири кучли экалиги ҳақида ҳар кимнинг ўз фикри бор. Лекин, бизнингча уларни таққослаб бўлмайди. Бу иккиси шубҳасиз, дунё футболи тарихидаги энг кучли юлдузлар сифатида эсланаверади.