Иш берувчи раҳбар билан суҳбатлашиш — бу номзод учун яхшигина имтиҳон бўлиб, унда ўзингизни максимал тарзда яхши ҳислатингизни кўрсатишингиз лозим. Сизнинг у билан суҳбатингиз келажакда яхши ишда ишлаш ёки ишламаслигингизни белгилаб бериши мумкин.
Суҳбатда биринчи бўлиб қиладиган нарсангиз бу ўзингизни таништириш. Яъни кимсиз, қайси лавозимга кўриляпсиз, бўш иш ўрни ҳақида қаердан билдингиз.
Ундан сўнг ўша сиз кўрилаётган иш хусусида сўранг. Вазифага нималар киради, иш ўрни қаерда, иш графиги соат нечидан нечигача ва ҳоказо. Дарҳол маош ҳақида сўз очманг. Бунақа одамларни раҳбар киши бирдан фарқлаб олади ва сизга нисбатан бу киши ўзига яхши ойлик излаяпти шекилли, деб сиз билан бошқа суҳбатлашмайди. Уни олдида обрўингиз тезда тушиб кетади.
Камчиликларингизни айтманг, гапириш учун кичкина матн тайёрлаб олинг. Сизга таклиф қилинаётган лавозимнинг моҳиятини англашга ҳаракат қилинг, ўша корхонанинг ривожига қандай ҳисса қўша олишингизга эътибор қилинг.
Сизни қўлга киритгач, ўша корхона нимага эга бўлади шуларни ўйланг. Бошлаган жумлангизни аниқ тугатинг.
Бунинг учун кўзгу олдига туриб олиб, машқ қилсангиз бўлади. Нималарни гапиришни, ўзингизни қандай тутишни ва ҳоказоларни бирров репетиция қилиб олинг.
Яна бир муҳим жиҳат: айтайлик сизни соат 11.00 га чақиришган. Албатта 10.45 да ўша ерда бўлинг. Чиройли кийиниб олинг, озода аҳволда келинг. Дастлабки хулоса кийинишингизга қараб берилади.
Айрим иш берувчи раҳбарлар атайин қалтис саволларни тайёрлаб қўйишади. Масалан, аввалги ишингиздан нега кетдингиз? Қандай камчиликларингиз бор? Бизда қанча муддат ишламоқчисиз? Бир ютуқларингизни санаб берингчи… Нега бизда ишлагингиз келиб қолди? Агар қўшимча ишлар юклатилса, қила оласизми, ва ҳоказо саволларга жавобни тайёр қилиб қўйинг. Шунда довдирамайсиз.
Савол берса жавобни тезда бошламанг. Озроқ ўйлаб кейин гапиринг. Бу билан ўзингизнинг қадрингизни кўрсатасиз. Гоҳида, иш берувчига жавоб эмас, сизнинг қандай тутишингиз муҳимроқ бўлади. Ҳеч нарсадан ҳаяжонланмасдан бир хил ритмда жавоб қайтаринг. Суҳбат пайтида кўчани шевасини ишлатманг.