Франциялик ҳужумчи Карим Бензема Мадриднинг «Реал» жамоасини тарк этганидан хабарингиз бор. Испания Ла Лигасида 14 йил ўйнаб келган мазкур «Олтин тўп» соҳиби фаолиятини Саудия Арабистони чемпионатида давом эттирадиган бўлди. 35 ёшли юлдуз «Ал-Иттиҳод» жамоаси билан 2 йиллик шартномани имзолаган. Агар томонлар бир-бирларига маъқул келишса шартнома яна 1 йилга чўзилиши мумкин. Карим Бензема Арабистонда, деб Интернет тармоқларида кўплаб янгиликлар чиқиши тўхтамаяпти. Биз ҳам ушбу янгилик атрофида бафуржа тўхталиб ўтамиз.
Энди Карим Бензема Арабистонда ўйнайди
Бензема Мадрид фанатлари билан хайрлашиб бўлгач, янги клуби ихтиёрига учиб кетди. Маълумотларга қараганда, араблар унга йилига 100 миллион евро маош беришади. Бу кичкина кўрсаткич эмас. Келинг, аввал Саудия Арабичтонидага ҳолат ҳақида айтиб кетсак.
Ушбу диёрда футбол клублари хусусий секторга бериладиган бўлди. Мамлакат Vision 2030 лойиҳасини бошлаган. Унга кўра, Саудия Арабистони қиролининг ўғли Муҳаммад ибн Салмон ас-Сауд ушбу лойиҳа орқали миллий чемпионатни бутун дунёдаги топ-10 лигалар рўйхатига олиб чиқмоқчи. Лойиҳа икки босқичдан иборат. Биринчи босқичда инвесторлар клубларга пул тикишади. Иккинчи босқичда спорт клублари инвесторлар ихтиёрига ўтади. Улар клубларнинг хўжайиига айланишади. Табиий рақобатни кучайтириш орқали Саудия Арабистони миллий чемпионатининг савиясини оширишади. Инфратузилмаларни ривожлантириб, дунё даражасидаги лигага айлантиришади.
Хуллас, Бензема араблар юртига равона бўлди. Мадрид президенти Флорентино Перес уни кузатаётиб қуйидаги сўзларни айтди:
«Бугун мен жуда ҳаяжондаман, ўтган 14 йиллик даврни таҳлил қиляпман. Каримни кузата туриб, кўплаб мухлисларда қайғули юзларни кўрдим. Улар шу йиллар давомида Бенземанинг мўъжизакор ўйинларидан мафтун бўлиб келишганди. Қардли Карим, сен дунё футболидаги ноёб футболчилардан бири бўла олдинг. Биз сени ажойиб ўйинларингдан лол қолгандик. Буни биронта ҳам «Реал» ишқибози унутмайди. Сен бу ерга ёш йигит ҳолингда келгандинг. Йиллар ўтиб буюк афсонага айландинг. Ўйининг орқали бизни қуюшқондан чиқариб юборгандинг. Сен бетакрор бўлиб қолаверасан. Айримларга сенинг савиянгни тушуниш учун вақт керак. Сенга ҳаммаси учун катта раҳмат. Биз билан бўлган вақтинг учун ташаккур».
Кетар чоғида Бензема нималар деди?
«Қироллик клуб»ни тарк этаркан Франция юлдузи қуйидаги дил сўзларини айтиб ўтди:
«Бу қадар улкан ҳис-туйғуларни татиб турган бир пайтда гапиришнинг ўзи жуда қийин бўларкан. Мен бирга ўйнган йигитларга ва клубга миннатдорчилик изҳор қилмоқчиман. Болаликдаги орзуимга етиша олдим. Мен «Реал»ни ҳеч қачон унутмайман. Бу имконсиз, сабаби Мадрид — дунёдаги энг буюк клубдир. Аммо, мени кетар пайтим етди. Бошқа тарихни яратишни истайман. Клубга катта раҳмат, у менинг ҳаётимни ўзгартириб юборди. Пересдек одам борки, у жамоага Роналдо ва Зидан каби дунё юлдузларини олиб кела олди. У мисли кўрилмаган прездентдир. Анчелоттига алоҳида ташаккур. У менга ишонди. Ундан кўп нарсани ўргандим. Мадрид билан шартнома имзолаганимда фаолиятимни шу ерда тугатишни истагандим. Аммо, ундай бўлиб чиқмади. Буни ҳаёт дейдилар». Бу унинг кетиш пайтидаги гаплари эди.
Саудия Арабистонининг «Ал-Иттиҳод» клуби эса ўша куннинг ўзида Бенземанинг трансферини эълон қилди. Футболчи йилига 100 миллион евро миқдорда маош оладиган бўлди. Шартнома 2026 йилгача давом этади.
Эслатиб ўтамиз, «Ал-Иттиҳод» бу йил мамлакат чемпиони бўлган. Клуб Криштиану Роналду иштирок этадиган «Ан-Наср»ни орта қолдира олган.
Янги лигадан янги хабарлар
Бензема янги клуби ҳақида қуйидагиларни айтиб ўтди:
«Бошқа давлатдаги янги лига билан танишганимдан хурсандман. Бу клубнинг ажойиб тарихи бор экан. Фанатларининг қадри баланд, клуб эса улкан мақсадларни олдига қўйган. Мен Европада катта совринларга эриша олдим. Энди эса Осиёда шу ишларни қилишни истайман. Бу ўлкага қачон келсам, очиқлик ва самимиятни кўраман. Қўлимдан келганча янги жамоамга ёрдам бераман ва голлар ураман. Бу кучли лига, чунки унда Криштиану Роналду бор. У менинг дўстим бўлади», — дея якун ясади франциялик юлдуз.
Энди Карим Бензема Арабистонда тўп суради. Ўйлашиммизча, бу кетишда кўплаб юлдузлар ушбу лигага ўтишлари мумкин. Ўзбекистон клублари ОЧЛда муваффаққиятли иштирок этадиган бўлишса, Тошкентда бу юлдузларга кўзимиз тушиши турган гап.